Bunge limeidhinisha marekebisho ya sheria ya uwekezaji nchini Tanzania kwa kuunganisha taasisi mbili zinazohusika na uratibu wa uwekezaji kuwa mamlaka moja.
Muswada wa Uwekezaji na Kanda Maalum ya Kiuchumi wa mwaka 2024 umefuta na kuchukua nafasi ya Sheria ya Uwekezaji ya mwaka 2022, Sheria ya Maeneo ya Usindikaji wa Mauzo ya Nje ya mwaka 2002, na Sheria ya Maeneo Maalum ya Kiuchumi ya mwaka 2006 huku ukileta mabadiliko makubwa kwenye sheria za uwekezaji.
Mabadiliko haya yanahusisha muungano wa Kituo cha Uwekezaji Tanzania (TIC) na Mamlaka ya Maeneo ya Usindikaji wa Mauzo ya Nje (EPZA) kuwa taasisi moja itakayojulikana kama Mamlaka ya Uwekezaji na Maeneo Maalum ya Kiuchumi Tanzania.Kwa kuunganisha sheria hizi tatu, serikali inalenga kuondoa urudufu wa majukumu na kuunda mfumo mmoja wa kisheria kwa ajili ya uwekezaji nchini.Hatua hii inafuatia tathmini ya utendaji wa taasisi za umma iliyofanyika mwaka 2023, ambayo ilibaini kuwa taasisi nyingi zilikuwa na majukumu yanayofanana, hali iliyosababisha gharama kubwa za uendeshaji kwa serikali.
“TIC na EPZA ni miongoni mwa taasisi za umma zilizobainika kuwa na majukumu yanayofanana, jambo lililopelekea uamuzi wa kuziunganisha kuwa taasisi moja,” alisema Waziri wa Nchi, Ofisi ya Rais (Mipango na Uwekezaji), Prof. Kitila Mkumbo, alipowasilisha muswada huo bungeni.Mamlaka hiyo mpya itakuwa taasisi kuu ya serikali kwa ajili ya uratibu na uhamasishaji wa uwekezaji, pamoja na kutoa ushauri wa kisera.
Ili kuhakikisha uwekezaji unalingana na vipaumbele vya taifa, sheria mpya imeanzisha Kamati ya Kitaifa ya Maendeleo ya Uwekezaji, ambayo itakuwa na jukumu la kutoa mwelekeo wa kimkakati, kupitisha mipango ya uwekezaji, na kupendekeza motisha kwa wawekezaji wa kimkakati.
Mabadiliko mengine muhimu yanayoletwa na sheria hii mpya ni kuanzishwa kwa mfumo mmoja wa kielektroniki wa kurahisisha michakato ya uwekezaji.Jukwaa hili lililounganishwa litaunganisha mamlaka zote husika zinazotoa vibali, leseni, na idhini mbalimbali, hivyo kuwawezesha wawekezaji kupata huduma zote muhimu kwa urahisi ndani ya mfumo mmoja. “Hatua hii itawawezesha wawekezaji kupata huduma kwa urahisi bila kulazimika kuhangaika na taasisi mbalimbali kwa ajili ya vibali au leseni,” alisema Prof. Mkumbo.
